Blog

काठमाडाैँ – अष्ट्रेलियाका अलराउन्डर विल बोसिस्टो नेपाल प्रिमियर लिग (एनपीएल) तेस्रो संस्करणमा काठमाण्डु गोर्खाजबाट खेल्ने भएका छन् ।

काठमाण्डुले सामाजिक सञ्जालमार्फत बोसिस्टोलाई अनुबन्ध गरेको जानकारी दिएको हो ।

बोसिस्टोले एनपीएलको अघिल्ला २ संस्करणमा कर्णाली याक्सबाट खेलेका थिए । तेस्रो संस्करणमा भने उनी नयाँ टोलीबाट मैदान उत्रिनेछन् ।

काठमाण्डुले यसअघि अष्ट्रेलियाका अनुभवी ब्याटर डेविड वार्नर, श्रीलंकाका सहान अराचिङ्गे र भारतका केएस भरतलाई पनि टोलीमा समेटिसकेको छ ।

३३ वर्षीय बोसिस्टो ब्याटिङसँगै अफब्रेक बलिङ गर्ने क्षमता भएका खेलाडी हुन् । उनले अष्ट्रेलियाको उमेर समूहको क्रिकेटमा समेत महत्त्वपूर्ण भूमिका निर्वाह गरेका थिए । सन् २०१२ मा अस्ट्रेलियाको यू–१९ टोलीको कप्तानी गरेका उनले सोही वर्षको यू–१९ विश्वकप खेलेका थिए ।

बोसिस्टोले अस्ट्रेलियाको घरेलु क्रिकेटमा फर्स्ट क्लास, लिस्ट ‘ए’ र टी–२० प्रतियोगिता खेलेका छन् । उनले फर्स्ट क्लास क्रिकेटका २८ खेलमा १ हजार १०० भन्दा बढी रन बनाउनुका साथै अफब्रेक बलिङबाट १७ विकेट लिएका छन् ।

दुबई – विश्वप्रसिद्ध मिशेलिन गाइडको दुबई संस्करण २०२६ को समारोहमा नेपाली सेफ डिल्लीकुमार दाहाल सहभागी भएका छन् ।

दुबईमा आयोजित समारोहमा विश्वभरका प्रतिष्ठित रेस्टुरेन्ट, सेफ तथा आतिथ्य क्षेत्रका प्रतिनिधिहरू सहभागी भएका थिए ।

बुल्गारी रिसोर्ट दुबईका नेपाली सेफ दाहालले अन्तर्राष्ट्रिय स्तरको प्रतिष्ठित पाककला समारोहमा सहभागिता जनाएका हुन् । विश्वस्तरीय मञ्चमा नेपाली सेफको सहभागिताले नेपाली पाककला तथा आतिथ्य क्षेत्रमा कार्यरत नेपाली प्रतिभाको अन्तर्राष्ट्रिय उपस्थितिसमेत देखाएको छ ।

समारोहमा जापानी रेस्टुरेन्ट होसेकीले जापानी परम्परा, संस्कृति र पाककलामा आधारित विभिन्न परिकार प्रस्तुत गरेको थियो । सेफ दाहालका अनुसार कार्यक्रममा ब्लुफिन टुना कलर शाबु–शाबु, टेन्डर ब्रेज्ड अक्टोपस, हेयरी र्क्याब र स्वीट तामागोयाकी लगायतका परिकार प्रस्तुत गरिएको थियो ।

दाहालका अनुसार होसेकी जापानी परम्परा र संस्कृतिमा आधारित प्रतिष्ठित परम्परागत जापानी सुसी रेस्टुरेन्ट हो । दुबईस्थित बुल्गारी रिसोर्टमा रहेको होसेकीलाई मिशेलिन गाइडले २०२६ को संस्करणमा एक मिशेलिन ताराले सम्मानित रेस्टुरेन्टका रूपमा सूचीबद्ध गरेको छ ।

समारोहमा सहभागी हुँदाको अनुभव सुनाउँदै दाहालले मिशेलिन गाइडको अन्तर्राष्ट्रिय स्तरको समारोह प्रत्यक्ष अनुभव गर्ने अवसर विशेष रहेको बताए । आकर्षक प्रस्तुति, उत्कृष्ट आतिथ्य र विश्वस्तरीय खानाको विविधताले कार्यक्रमलाई थप स्मरणीय बनाएको उनको भनाइ छ ।

उनका अनुसार मिशेलिन गाइड समारोह पाककला, रेस्टुरेन्ट तथा आतिथ्य क्षेत्रमा उत्कृष्टता, सिर्जनशीलता र अन्तर्राष्ट्रिय पहिचानको उत्सवका रूपमा स्थापित भएको छ ।

मिशेलिन गाइडको दुबई संस्करण २०२६ मा ३८ प्रकारका खानाका परिकार समेटिएका १२२ रेस्टुरेन्ट समावेश छन् । यस संस्करणमा ३ मिशेलिन तारा सहितका २/२ तारा सहितका ४ र १ तारा सहितका १४ रेस्टुरेन्ट सूचीमा छन् ।

विश्वस्तरीय पाककला मञ्चमा नेपाली सेफ दाहालको सहभागिताले नेपाली प्रतिभाले अन्तर्राष्ट्रिय पाककला तथा आतिथ्य क्षेत्रमा बनाउँदै गएको पहिचानलाई समेत उजागर गरेको छ ।